Euskaldunon Egunkaria
------------------------------------------------------------------------
Bat-batekotasuna eta naturaltasuna oinarri dituen soinua bilatu du oñatiarrak

Ruper Ordorikak "doinu eta hitzen iturria" zabaldu du bere disko berrian Ben Monder, Kenny Wollesen eta Fernando Saundersekin grabatu du ÔHurrengo goizean" Ruper Ordorikak Hurrengo goizean (Metak) disko berria, bere hamabigarrena, kaleratu du. Ben Monder gitarrista, Fernando Saunders baxu jole eta Kenny Wollesen bateria jolearekin grabaturiko lan honetan bat-batekotasunean eta naturaltasunean finkaturiko oinarrizko soinu baten bila jo du berriz ere kantari oñatiarrak. Bilaketa lan hura Monder eta Wollesenen laguntzarekin aurreko diskoan "Dabilen harria"abiatu zuen Ordorikak. Disko hartan lortutakoak arras ase zuen, baina oraingoan are urrutirago joan nahi izan du. "Dabilen harria bezala, entseatu gabe sartu gara estudioan eta iturria zabaldu dugu, doinuak eta hitzak isur zitezen. Gakoa zen une bereziak harrapatzea eta entzuleak gauza bera sentitzeko moduan jasotzea. Aurreko diskoaren esperientzia genuen alde, baina oraingoan urrats bat gehiago egin eta naturaltasun hori ekoizpenera ere zabaltzen saiatu gara", azaldu du. Kontraesana dirudien arren, bat-bateko soinu horren bilaketan "lan handia" dagoela eta egiteko "oso musikari onak" behar direla dio Ordorikak. Hirugarren aldiz jo du Monderrengana, eta bigarren aldiz Wollesenengana, biak kalitatea egiaztatua duten musikariak. Diskoko ustekabe nagusia ordea, Lou Reeden taldeko baxu jole Fernando Saundersen parte hartzea izan da. Harekin lan egiteko aukera baliatu izana Jonan Ordorika bere anaiari zor dio Ruperrek. Dabilen harria-ren kopia eman zion Saundersi Lou Reeden kontzertu baten ondoren, eta baxu jole estatubatuarrari gustatu zitzaion. "Musikarien artean ohikoak dira horrelako adierazpenak ondo geratzeko, eta Saundersen kasuan gauza bera pentsatu nuen. Baina gero diskoa grabatzeko prest agertu zen eta erakutsi zidan benetan gustukoa zuela nire lana, melodiak zekizkien. Diskoan ez du bilatu bere burua nabarmentzea eta hori ere eskertu behar diot, duen kalitatea eskaintzera etorri da", azaldu du Ordorikak. Estilo aniztasuna Beharbada Hurrengo goizean da, kantuen estilo aniztasunari erreparatuta, Ruper Ordorikak inoiz grabatu duen diskorik osatuena. Bihotz begiekin da lehen singlea, baina Ttikiegi edota Noeren ontzi batean ere izan zitezkeen, intimismo eta malenkonia hunkigarriak gainezka egiten dute beste batzuetan (Zure ate ondoan, Fatuaren baitan), eta beste sorta eder bat su motelean egositako kantuek osatzen dute (Zazpigarrenean, Desiorik onena, Mila gau edota Gorde-gordeka, azken horretan beste modu batean abestera "ausartu" da Ordorika). Zuzeneko emanaldietan, Nando de la Casa (bateria), Dani Perez eta Javi Antoñana (gitarra) eta Josu Gereñorekin (baxua) ariko da Ordorika. Lehen aurkezpen kontzertua Santurtzin emango du hilaren 23an, hurrengo egunean Tafallan izango da, 25ean Urruñan eta Bartzelonan amaituko du, hilaren 26an, lehen aurkezpen sorta. Abenduan Bilbon (14an), Aezkoan (15ean), Gasteizen (19an), Donostian (20an), Berangon (21ean) eta Elgoibarren (28an) joko du. "Estudioan bat-batean jotzen sortzen diren une bereziak harrapatzea eta islatzea da gakoa" "Fernando Saunders ez da etorri bere burua nabarmentzera, duena eskaintzera baizik

Jon Eskisabel